Respondens autem Baldad Suhites, dixit:

Potestas et terror apud eum est,
qui facit concordiam in sublimibus suis.

Numquid est numerus militum ejus?
et super quem non surget lumen illius?

Numquid justificari potest homo comparatus Deo?
aut apparere mundus natus de muliere?

Ecce luna etiam non splendet,
et stellæ non sunt mundæ in conspectu ejus:

quanto magis homo putredo,
et filius hominis vermis?