Biblia Sacra Vulgata
Liber Psalmorum
|
Psalmus 92
|
Laus cantici ipsi David, in die ante sabbatum, quando fundata est terra.
1
Dominus regnavit, decorem indutus est:
indutus est Dominus fortitudinem, et præcinxit se.
Etenim firmavit orbem terræ, qui non commovebitur.
2
Parata sedes tua ex tunc;
a sæculo tu es.
3
Elevaverunt flumina, Domine,
elevaverunt flumina vocem suam;
elevaverunt flumina fluctus suos,
4
a vocibus aquarum multarum.
Mirabiles elationes maris;
mirabilis in altis Dominus.
5
Testimonia tua credibilia facta sunt nimis;
domum tuam decet sanctitudo, Domine,
in longitudinem dierum.