cum venissent Ziphæi, et dixissent ad Saul: Nonne David absconditus est apud nos? (I Regum 23.19.)

Deus, in nomine tuo salvum me fac,
et in virtute tua judica me.

Deus, exaudi orationem meam;
auribus percipe verba oris mei.

Quoniam alieni insurrexerunt adversum me,
et fortes quæsierunt animam meam,
et non proposuerunt Deum ante conspectum suum.

Ecce enim Deus adjuvat me,
et Dominus susceptor est animæ meæ.

Averte mala inimicis meis;
et in veritate tua disperde illos.

Voluntarie sacrificabo tibi,
et confitebor nomini tuo, Domine, quoniam bonum est.

Quoniam ex omni tribulatione eripuisti me,
et super inimicos meos despexit oculus meus.